Beesha Caalamka oo war murtiyeed ka soo saaray khilaafka adag ee u dhaxeeya madaxda dowladda

Muqdisho,cisaleey,15.Sept.2010

Qaramada Midoobey, Midowga Yurub ayaa ka digay khilaafka u dhaxeeya Madaxda ugu sareysa Dowladda KMG ah ee Soomaaliya, iyagoo ka soo saaray baaq ku wajahan xalinta khilaafka.

War murtiyeed ka soo baxday Xafiisyada Ururadaas ee magaalada Nairobi ayaa ugu horeyn waxaa walaac looga muujiyay khilaafkaas baaxada leh, iyagoo ugu baaqay Madaxda inay khilaafkooda ku dhameeyaan wada hadal.

Madaxda Dowladda ayaa loogu baaqay inay muujiyaan Midnimo iyo sida wax lagaga qaban karo dhibaatooyinka haatan ka taagan dalka Soomaaliya ee ah dhinacyada ammaanka iyo waajibaadka saaran hey'adaha dowladda.

War murtiyeedka ayaa lagu xusuusiyay Dowladda KMG in xilligan Ciidamada AMISOM ay naftooda u hurayaan qatarna u gelinayaan maalin kasta difaacida Dowladda KMG iyo degenaanshaha Caasimada.

"Kuwa faa'iidada ugu badan ka helaya kala qaybsanaantani waa kooxaha xagjirka ah ee ugu jira dagaalka sidii ay u qabsan laaayeen hoggaanka dalka"ayuu yiri Amb. Agustin Mahiga oo ah Ergeyga u qaabilsan Qaramada Midoobey arrimaha soomaaliya.

Baaqyada ka soo baxa Beesha Caalkamka ayaa imaanaya xilli uu cirka isku sii shareeray khilaafka baaxada leh ee u dhaxeya Madaxda ugu sareysa Dowladda KMG Soomaaliya, kuwaasi oo haatan wada dhaq dhaqaaqyo siyaasadeed.

Xafiiska Muqdisho iyo wararkii ugu danbeeyay